2 Chronicles 26
1 所有猶大人民全部設立亞瑪謝十六歲个孻仔烏西雅承接佢做王。
2 亞瑪謝死後，烏西雅將以拉他收轉來歸屬猶大，重新整過。
3 烏西雅十六歲時做王，在耶路撒冷統治五十二年。厥姆耶可利雅係耶路撒冷人。
4 烏西雅學厥爸亞瑪謝个模樣，行上主看做著个事。
5 在撒迦利亞教佢樣般敬畏上帝个年日，佢專心尋求上帝；佢忠心事奉上主个時，上帝就賜福給佢。
6 烏西雅㧯非利士人相㓾。佢拆掉迦特城、雅比尼城㧯亞實突城个城牆，又在亞實突附近㧯非利士其他所在起防衛城。
7 上帝幫助佢打贏非利士人、住在姑珥‧巴力个阿拉伯人，㧯米烏尼人。
8 亞捫人向烏西雅進貢。佢个勢力強大，名聲傳到埃及。
9 烏西雅為到加強耶路撒冷个防備工事，在角門、谷門㧯城牆轉角个所在全部起盡堅固个城樓。
10 佢也在城外造守望塔，挖盡多井，因為佢在西片山腳下㧯平原有當多牛群。因為佢注重耕種，就鼓勵人民在山地種葡萄，在平原肥个土地來耕種。
11 烏西雅有強大个軍隊，隨時做得編隊上戰場。軍方个記錄有祕書耶利㧯官長瑪西雅保管，並有王室个一個指揮官哈拿尼雅監督。
12 軍隊有兩千六百個家族領袖指揮；
13 佢等手下有三十萬七千五百個士兵，全部係當會相㓾个，有能力做得為王打贏敵人个戰士。
14 烏西雅為全軍隊裝備盾牌、槍、鐵帽、戰甲、弓箭、㧯愛拂个石仔。
15 在耶路撒冷，佢个工程師在城樓㧯城牆轉角安機器，做得對頂高射箭，㧹大石頭。佢个名聲傳到逐位，勢力非常強大，因為上帝幫助佢。
16 烏西雅王个強大使佢漸漸驕傲起來，為自家惹災禍。佢得罪上主—佢个上帝，因為佢入上主个聖殿去，想愛親身在香壇頂燒香。
17 祭司亞撒利雅帶等八十個上主勇敢个祭司跈等王入去，
18 愛阻擋佢。佢等講：「烏西雅啊，你無權向上主燒香；只有亞倫後代做祭司个，正係分別為聖來做這事个人。請離開這聖地。你已經得罪主上帝；你再得毋到佢給你个榮耀了。」
19 烏西雅企在聖殿个香壇堘頭，手拿等香爐。佢對該兜祭司發譴，就在該時，佢个額頭忽然發癩病。
20 大祭司亞撒利雅㧯其他祭司看到王个額頭發癩病，佢等就逐佢離開聖殿；佢自家也趕緊離開，因為上主已經責罰佢。
21 烏西雅王賸到个年日因這癩病在禮儀上無淨浰，住在隔離个王宮肚，做毋得再入聖殿；國家大事交給厥孻仔約坦掌管。
22 亞摩斯个孻仔以賽亞先知將烏西雅王統治期間所有个事全部記錄下來。
23 烏西雅死後，葬在王室个塚埔，毋係在王室个墳墓肚，因為佢發過癩病。佢个孻仔約坦承接佢做王。